URB – Uniun da las Rumantschas

e dals Rumantschs en la Bassa

Inscunter interrumantsch –
2 da zercladur 2016

Giast da la saira: Men Steiner

è creschì si a Scuol ensemen cun ina sor ed in frar sco il pli giuven da la famiglia. A la scola chantunala a Cuira ha el fatg il seminari da magisters. Suenter avair dà dus onns scola a Puntraschigna ha’l fatg il studi da magister secundar fil. 2 a l’Universitad da Turitg. Dà scola ha el a Turitg, en Africa (Ghana) ed a Cuira. Dal 1984 è el vegnì tschernì sco schurnalist tar il Radio Rumantsch. Tar il RTR ha el lavurà en differentas funcziuns fin tar sia pensiun dal 2004.

La passiun da Men Steiner è adina stada la musica. Gia cun diesch onns ha el cumenzà a sunar la gìa, er sche na deva da quel temp en Engiadina anc naginas scolas da musica. Suenter il seminari ha el entschet a sunar ghitarra e s’ha perfecziunà sin basa autodidacta. El ha cumponì diversas chanzuns, dà blers concerts – per ina buna part ensemen cun Aita Biert - e registrà durant ils onns 70 ed 80 varsaquantas chanzuns sco chantadur e chantautur. El ha inizià la gruppa Ils Fränzlis da Tschlin ed è stà il violinist dals Fränzlis durant bundant 30 onns.

Men è maridà cun Claudia Simmen dad Andermatt. El ha duas figlias or da prima letg e trais biadis. Dapi sia pensiun fa el da chasarin, da bazegner (tat), giauda la vita e - co pudessi esser auter – è anc adina in musicant passiunà.

I vegn offrì in aperitiv. Tar in bun sitg datti er temp e peda per in bun discurs. Ins sa er empustar ina fina tschaina.